اسلام آباد تھانہ مارگلہ کی حدود میں چینی باشندے کی گاڑی کو پیش آنے والے حادثے میں ایک نوجوان جاں بحق ہوگیا۔ واقعہ گزشتہ روز نیو بلیو ایریا جناح ایونیو ایف نائن پارک مہران گیٹ کے سامنے سڑک پر پیش آیا۔
تفصیلات کے مطابق، چینی شہری کی گاڑی کا ٹائر پھٹنے کے باعث گاڑی بے قابو ہو کر نوجوان پر چڑھ دوڑی، جس کے نتیجے میں نوجوان موقع پر ہی دم توڑ گیا جبکہ چینی شہری کو معمولی چوٹیں آئیں۔
حادثے میں جاں بحق ہونے والے نوجوان کی شناخت ولی اللہ ولد بخت منیر کے نام سے ہوئی ہے، جو اَپر دیر، خیبر پختونخوا کا رہائشی تھا اور اس کی عمر تقریباً 22 سے 23 سال بتائی جارہی ہے۔
