فیصل آباد: گورنمنٹ کالج یونیورسٹی فیصل آباد کے نیو کیمپس میں گیارہویں کانووکیشن کا انعقاد کیا گیا جس میں گورنر پنجاب محمد بلیغ الرحمان نے بطور مہمان خصوصی شرکت کی۔
تقریب میں وائس چانسلر پروفیسر ڈاکٹر ناصر امین کے ہمراہ یونیورسٹی ڈینز، ڈائریکٹرز اور پرنسپل آفیسرز شریک تھے۔ تقریب میں پی ایچ ڈی ڈگری ہولڈرز،ایم فل،ایسوسی ایٹ ڈگری،ماسٹرز ڈگری،ایل ایل بی اور بی ایس آنرز کے مختلف سیشنز کے 87356 طلباء و طالبات کو ڈگریز تفویض کی گئیں۔تعلیمی میدان میں امتیازی پوزیشن حاصل کرنے پر 178 طلباء و طالبات کو گولڈ میڈلز،براؤن میڈل حاصل کرنے والے 228 جبکہ 226 طلباء و طالبات کو سلور میڈلز سے نوازا گیا۔ کنٹرولر امتحانات راجہ شاہد جاوید، رجسٹرار محمد آصف لطیف اور ڈپٹی رجسٹرار ذیشان احمد خان نے کانووکیشن کی کارروائی کو آگے بڑھایا۔
گورنر پنجاب محمد بلیغ الرحمان نے طلباء و طالبات کو شاندار کامیابی پر مبارکباد پیش کی ان کا کہنا تھا کہ یقینا آج کا دن طلبہ کے لئے باعث مسرت اور کامیابیوں سے بھر پور ہے۔
انہوں نے امید کا اظہار کیا کہ ڈگری حاصل کرنے والے طلبہ اپنے منفرد تحقیقی ذہن کے ذریعے ادارے،اساتذہ اور ڈگری کے وقار میں اضافہ کریں گے اور طلباء کی پیشہ ورانہ صلاحیتوں کو اجاگر کرنے میں یونیورسٹی انتظامیہ کی کاوشوں کو سراہا۔
وائس چانسلر پروفیسر ڈاکٹر ناصر امین نے اس موقع پر گورنر پنجاب کی آمد کا شکریہ ادا کیا اور یونیورسٹی کی گزشتہ برسوں میں حاصل کردہ کامیابیوں اور ترقیاتی منصوبوں کے بارے میں تفصیلی طور پر آگاہ کیا۔ انہوں نے کہا کہ یونیورسٹی میں جدید تحقیق و تدریس کی طرف بھرپور توجہ دی جا رہی ہے۔
ان کا کہنا تھا کہ ٹائمز ہائر ایجوکیشن ورلڈ یونیورسٹی رینکنگ میں جی سی یونیورسٹی فیصل آباد پنجاب میں پہلے نمبر پر جبکہ پاکستان بھرسے تیسرے نمبر پر موجود ہے۔کانووکیشن میں سینڈیکیٹ ممبران، مختلف یونیورسٹیز کے وائس چانسلرز سمیت ضلعی انتظامیہ کے افسران نے بھی شرکت کی۔
