اوٹاوا:. پاکستان-کینیڈا دوطرفہ سیاسی مشاورت کا پانچواں دور 26 اپریل 2024 کو اوٹاوا میں منعقد ہوا۔ پاکستانی وفد کی قیادت سفیر مریم آفتاب، ایڈیشنل سیکرٹری خارجہ (امریکہ) نے کی، جبکہ کینیڈین وفد کی سربراہی اسسٹنٹ ڈپٹی منسٹر ( ہند و بحرالکاہل ) عالمی امورکینیڈا ویلڈن ایپ نے کی ۔
دونوں اطراف نے دوطرفہ تعلقات کے تمام پہلوؤں کا جائزہ لیا اور خاص طور پر تجارت، سرمایہ کاری، تعلیم، پارلیمانی تبادلوں، انسداد دہشت گردی اور عوام سے عوام کے رابطوں کے شعبوں میں مزید تعاون کے مواقع اور امکانات کی نشاندہی کی، ایڈیشنل سیکرٹری خارجہ نے پاکستان کی خارجہ پالیسی کی ترجیحات سے آگاہ کیا اور کینیڈین کمپنیوں کو پاکستان میں توانائی، کان کنی اور آئی ٹی کے شعبوں میں سرمایہ کاری کرنے کی دعوت دی۔
دونوں فریقوں نے اقوام متحدہ سمیت بین الاقوامی فورمز پر باہمی تعاون پر تبادلہ خیال کیا اور تعاون کو مزید گہرا کرنے پر اتفاق کیا۔ انہوں نے دوطرفہ تعلقات میں مجموعی پیش رفت پر اطمینان کا اظہار کیا اور باہمی دلچسپی کے تمام شعبوں میں تعاون بڑھانے کے عزم کا اظہار کیا۔
اجلاس میں کینیڈین فریق کو جنوبی ایشیائی خطے بالخصوص افغانستان، پاک بھارت تعلقات اور بھارت کے غیر قانونی طور پر مقبوضہ جموں و کشمیر میں انسانی حقوق کی خلاف ورزیوں کے حوالے سے حالیہ پیش رفت سے آگاہ کیا گیا۔
دوطرفہ سیاسی مشاورت کا چھٹا دور اسلام آباد میں باہمی طور پر مناسب تاریخوں پر منعقد ہوگا۔
