اسلام آباد : پاکستان مسلم لیگ (ق) اوورسیز یو کے کے سیکرٹری جرنل ڈاکٹر شوکت علی شیخ اور آزاد کشمیر کے نامزد صدر چوہدری محمد شفیق نے آزاد جموں و کشمیر کے سابق وزیراعظم اور صدر بیرسٹر سلطان محمود چوہدری کے انتقال پر گہرے دکھ اور افسوس کا اظہار کیا۔ مرحوم کو ایک باوقار اور تجربہ کار سیاستدان کے طور پر جانا جاتا تھا جنہوں نے کشمیر کے مسئلے کو بین الاقوامی سطح پر مؤثر انداز میں اجاگر کیا اور پاکستان کی سفارتی پوزیشن کو مضبوط بنایا۔
اپنے تعزیتی پیغام میں ڈاکٹر شوکت علی شیخ اور آزاد کشمیر کے نامزد صدر چوہدری محمد شفیق نے کہا:
“بیرسٹر سلطان محمود چوہدری ایک عظیم، مدبر اور باوقار سیاستدان تھے جنہوں نے آزاد جموں و کشمیر کی عوام کی فلاح و بہبود کے لیے نمایاں خدمات انجام دیں۔ انہوں نے مسئلہ کشمیر کو نہایت مؤثر، مدلل اور جرات مندانہ انداز میں عالمی سطح پر اجاگر کیا اور کشمیری عوام کی آواز دنیا کے اہم فورمز تک پہنچائی۔”
پاکستان کی بین الاقوامی سفارتکاری میں کردار:
پاکستان نے ہمیشہ ایسے رہنماؤں کے ذریعے انسانی حقوق اور علاقائی استحکام کے لیے کوششیں کی ہیں، خاص طور پر کشمیر کے مسئلے پر۔ بیرسٹر سلطان محمود چوہدری جیسے قائدین نے اقوام متحدہ، تنظیم اسلامی تعاون (OIC) اور دیگر بین الاقوامی اداروں میں پاکستان کی نمائندگی کی اور عالمی کمیونٹی کے ساتھ تعاون کو مضبوط بنایا۔
ڈاکٹر شوکت علی شیخ نے مرحوم کے اہل خانہ سے دلی ہمدردی کا اظہار کرتے ہوئے کہا کہ “ہم اس مشکل گھڑی میں سوگوار خاندان کے غم میں برابر کے شریک ہیں”۔ انہوں نے اللہ تعالیٰ سے دعا کی کہ مرحوم کو جوارِ رحمت میں جگہ عطا فرمائے اور لواحقین کو صبر جمیل عطا کرے۔
آزاد کشمیر کے نامزد صدر چوہدری محمد شفیق نے کہا
بیرسٹر سلطان محمود چوہدری کے انتقال سے پاکستان کی سیاسی اور سفارتی دنیا میں ایک مؤثر آواز کھو گئی ہے۔ ان کی میراث مستقبل میں سیاسی قیادت، سماجی بہبود، اور بین الاقوامی تعلقات میں رہنمائی فراہم کرتی رہے گی اور کشمیری عوام کے حق میں جدوجہد جاری رکھنے کی ترغیب دے گی۔
About The Author
