اسلام آباد – 9 جولائی 2025: ریلوے پبلک ریلیشنز آفیسر (PRO) کے مطابق، وزیر مملکت برائے خزانہ و ریلوے اور وزیرِاعظم کی ڈلیوری یونٹ کے سربراہ جناب بلال اظہر کیانی کی قیادت میں حکومت پاکستان کا ایک اعلیٰ سطحی وفد سرکاری دورے پر متحدہ عرب امارات (یو اے ای) پہنچا ہے۔ یہ دورہ یو اے ای حکومت کے “ایکسپیریئنس ایکسچینج پروگرام (EEP)” کے تحت ہو رہا ہے، جس کا مقصد ادارہ جاتی اصلاحات، بہتر عوامی خدمات کی فراہمی، اور سرکاری شعبے کی جدید کاری ہے۔
یو اے ای کے نائب وزیر برائے کابینہ امور و مقابلہ جاتی حکمت عملی جناب عبداللہ ناصر لوطاہ نے وفد کا پرتپاک استقبال کیا اور پاکستان کی ترقی میں مسلسل تعاون کی یقین دہانی کرائی۔ انہوں نے پاکستان کی مختلف شعبوں میں صلاحیت کو سراہا اور دونوں ممالک کے درمیان تعاون کو مفید قرار دیا۔
بلال اظہر کیانی نے یو اے ای حکومت کا شکریہ ادا کیا اور کہا کہ یہ دورہ ڈیجیٹل گورننس، ٹیکس نظام کی بہتری، اور سرکاری خدمات کے شعبے میں جدید ماڈلز سے سیکھنے کا بہترین موقع ہے۔ انہوں نے وزیراعظم شہباز شریف کے اصلاحاتی ایجنڈے، خاص طور پر ڈیجیٹائزیشن، ای کامرس، اور معاشی استحکام کے حوالے سے حکومتی عزم کو دہرایا۔
دورے کے دوران وفد نے یو اے ای کی اہم شخصیات جیسے کہ محترمہ مریم الحمادی، محترمہ حنان اہلی، ڈاکٹر رضیہ الہاشمی، اور محترم ہیثم الریس سے ملاقاتیں کیں۔ ان سیشنز میں حکومتی پالیسی، عالمی مسابقت، پبلک سیکٹر ایکسیلیریشن، اور پائیدار ترقی پر بات چیت ہوئی۔
یہ دورہ 16 جون 2025 کو یو اے ای کی وزارت کابینہ امور اور پاکستان کی وزارت منصوبہ بندی، ترقی و خصوصی اقدامات کے درمیان دستخط شدہ مفاہمتی یادداشت (MoU) کے بعد عمل میں آیا ہے، جو دونوں ممالک کے درمیان ادارہ جاتی ترقی اور شراکت داری کے نئے دور کا آغاز ہے۔
About The Author
