ڈسٹرکٹ بار ایسوسی ایشنز ملتان اور جھنگ کے ایک وفد نے سپریم کورٹ آف پاکستان، اسلام آباد میں معزز چیف جسٹس پاکستان، جناب جسٹس یحییٰ آفریدی سے ملاقات کی۔
معزز چیف جسٹس نے وفد کا خیرمقدم کیا اور ان کے مسائل کو توجہ سے سنا۔ ملاقات کے دوران بار ایسوسی ایشنز کے نمائندگان نے پنجاب میں ہائی کورٹ اور وکلاء برادری کے درمیان رابطے اور ہم آہنگی کے فقدان پر روشنی ڈالی اور اس رابطے کو مضبوط بنانے کی ضرورت پر زور دیا۔ اس پر چیف جسٹس نے وضاحت کی کہ ہائی کورٹس خودمختار حیثیت رکھتی ہیں اور ان کے معاملات میں مداخلت کرنا مناسب نہیں ہوگا۔ تاہم، انہوں نے اس مسئلے کو تسلیم کرتے ہوئے مشورہ دیا کہ یہ معاملہ لاہور ہائی کورٹ کے چیف جسٹس کے ساتھ زیر بحث لایا جا سکتا ہے۔
چیف جسٹس نے بار کونسلز کی لاء اینڈ جسٹس کمیشن آف پاکستان (LJCP) میں نمائندگی کا بھی ذکر کیا اور وفد کو کمیشن کے آئندہ اجلاس کے بارے میں آگاہ کیا۔ انہوں نے وکلاء برادری کو دعوت دی کہ وہ اپنے تحفظات اور سفارشات پیش کریں تاکہ ان کو زیر غور لایا جا سکے۔
وکلاء برادری کی استعداد کار بڑھانے کی اہمیت پر زور دیتے ہوئے، چیف جسٹس نے وفد کو جاری قانونی تعلیم (Continuing Legal Education – CLE) کے تحت فیڈرل جوڈیشل اکیڈمی (FJA) کے تربیتی پروگرامز سے آگاہ کیا۔ انہوں نے بتایا کہ یہ پروگرام اکیڈمی کی ویب سائٹ پر دستیاب ہیں اور بار ایسوسی ایشنز ان سے فائدہ اٹھا کر وکلاء کی قانونی مہارت اور پیشہ ورانہ ترقی کو فروغ دے سکتی ہیں۔
مالی امور پر گفتگو کرتے ہوئے، چیف جسٹس نے وفد کو “ایکسس ٹو جسٹس ڈیولپمنٹ فنڈ” (AJDF) کے بارے میں بتایا، جو قانونی برادری کو مالی معاونت فراہم کرتا ہے۔ انہوں نے وکلاء کو اس فنڈ سے استفادہ کرنے کی ترغیب دی تاکہ عدالتی نظام کو مضبوط بنایا جا سکے اور قانونی وسائل تک مساوی رسائی کو یقینی بنایا جا سکے۔
وفد نے معزز چیف جسٹس کو ڈسٹرکٹ بارز کے دورے کی دعوت بھی دی۔ اس پر چیف جسٹس نے وکلاء برادری کے ساتھ روابط کو اپنی ترجیح قرار دیا اور کہا کہ وہ سب سے پہلے ملک کے دور دراز اور پسماندہ علاقوں کا دورہ کرنا چاہتے ہیں۔ تاہم، انہوں نے یقین دہانی کرائی کہ مناسب وقت پر وہ ان کی بار کا دورہ کریں گے۔
About The Author
