پارہ چنار یوتھ کی تنظیم ضلع راولپنڈی و اسلام آباد کے زیر اہتمام ہفتہ اسلام آباد پریس کلب کے سامنے مظاہرہ کیا گیا۔ مظاہرین نے پارہ چنار تری مینگل اسکول میں دہشت گردانہ حملے میں ملوث افراد کو گرفتار کرنے کا مطالبہ کیا۔
مظاہرین کا کہنا تھا کہ واقعہ کو ایک سال گزر چکا، قاتلین کی عدم گرفتاری کے خلاف ہم سراپا احتجاج ہیں۔مظاہرین میں واقعہ میں شہید ہونے والے اساتذہ کے بچوں سمیت کثیر تعداد میں ضلع کرم سے تعلق رکھنے والے افراد نے شرکت کی۔
اس موقع پر پارہ چنار یوتھ کے رہنما پروفیسر شبیر حسین نے خطاب کرتے ہوئے کہا کہ ایک سال پورا ہو چکا مگر آج تک تری مینگل اساتذہ کے قتل میں ملوث دہشتگردوں کو گرفتار نہیں کیا گیا۔
سانحہ 4 مئی تری منگل سکول میں ملوث دہشتگردوں کی عدم گرفتاری کے خلاف ہم بارہا احتجاج کر چکے ہیں، مگر وہ کونسے عوامل ہیں جن کی وجہ سے مٹھی بھر دہشت گردوں کو گرفتار نہیں کیا جا سکا۔ہمارا حکومت وقت سے پر زور مطالبہ ہے کہ وہ اندوہناک واقعے میں ملوث قاتلوں کو گرفتار کر کے قرار واقعی سزا دیں۔
مظاہرین سے خطاب کرتے ہوئے ذاکر حسین نے کہا کہ ضلع کرم پارہ چنار کے باشعور و محب وطن شہریوں کو سالہاسال سے نشانہ بنایا جاتا رہا ہے، آج تک کسی ایک دہشت گرد کو بھی گرفتار نہیں کیا جا سکا، اس عدم توجہی اور ناکامی نے قانون نافذ کرنے والے اداروں کی کارکردگی پر سوالیہ نشان کھڑے کر دیے ہیں۔
آج اس احتجاج میں واقعے میں شہید ہونے والے اساتذہ کے یتیم بچے بھی سراپا احتجاج ہیں اور ریاست سے انصاف کا تقاضا کر رہے ہیں۔
احتجاجی مظاہرے سے کاظم حسین، زین حسین و دیگر مقررین نے بھی خطاب کیا۔
