قومی اسمبلی کے حلقہ این اے 15 مانسہرہ میں الیکشن نتائج سے متعلق نواز شریف کی انتخابی عذرداری کی درخواست مسترد کر دی گئی۔جمعرات کے روز چیف الیکشن کمشنر سکندر سلطان راجہ کی سربراہی میں 2 رکنی بینچ نے این اے 15 مانسہرہ میں نواز شریف کی عذرداری درخواست کی سماعت کی۔
نواز شریف کے وکیل الیکشن کمیشن میں پیش نہ ہوئے تاہم ریٹرننگ افسر این اے 15 مانسہرہ نے اپنی رپورٹ الیکشن کمیشن میں جمع کروا دی۔جس پر بینچ نے فیصلہ دیتے ہوئے نواز شریف کی درخواست مسترد کر دی۔
فیصلے کے بعد نواز شریف کے وکیل پیش ہوئے اور درخواست مسترد نہ کرنے کی استدعا کی جس پر الیکشن کمیشن نے نواز شریف کے وکیل کو دوبارہ درخواست دائر کرنے کی ہدایت کر دی۔
واضح رہے کہ نواز شریف نے این اے 15 مانسہرہ کا انتخابی نتیجہ چیلنج کرتے ہوئے مخالف امیدوار شہزادہ گستاسپ خان کی کامیابی کا نوٹیفکیشن روکنے کی استدعا کی تھی۔
