امریکی نائب صدر جے ڈی وینس نے ویٹیکن کے اعلیٰ حکام سے ملاقات کی جس میں مہاجرین، پناہ گزینوں اور قیدیوں کے امور پر رائے کا تبادلہ ہوا۔ ویٹیکن کے مطابق یہ ملاقات ہفتے کے روز ویٹیکن کے سیکریٹری آف اسٹیٹ کارڈینل پیئیترو پیراولین اور ویٹیکن کے وزیر خارجہ آرچ بشپ پال گالاگھر کے ساتھ ہوئی۔
جے ڈی وینس، جو کیتھولک عقیدے سے تعلق رکھتے ہیں، ایسٹر ویک اینڈ کے موقع پر اپنے خاندان کے ہمراہ روم آئے اور سینٹ پیٹرز باسیلیکا میں گڈ فرائیڈے کی سروس میں شرکت کی۔
سی این این کے مطابق، یہ ملاقات پوپ فرانسس کی جانب سے ٹرمپ انتظامیہ کی امیگریشن پالیسی پر تنقید کے بعد ہوئی۔ ویٹیکن کے جاری کردہ بیان کے مطابق ملاقات میں عالمی صورتحال، جنگ زدہ ممالک، سیاسی کشیدگی، اور انسانی بحرانوں پر گفتگو ہوئی، خاص طور پر مہاجرین، پناہ گزینوں اور قیدیوں سے متعلق۔
ویٹیکن نے اس امید کا اظہار کیا کہ امریکہ میں ریاست اور کیتھولک چرچ کے درمیان پرسکون تعاون جاری رہے گا، اور چرچ کی کمزور طبقات کے لیے خدمات کو سراہا گیا۔
یہ ملاقات دوسرے ٹرمپ دور حکومت اور ویٹیکن کے درمیان پہلا براہ راست رابطہ تھا، جہاں کچھ پالیسی اختلافات کے باوجود باہمی احترام اور مذہبی آزادی کے تحفظ پر اتفاق کیا گیا۔
ویٹیکن نے اس بات کی بھی تصدیق کی کہ پوپ فرانسس، جو حالیہ دنوں میں نمونیا کے باعث صحتیابی کے عمل سے گزر رہے ہیں، سے ملاقات کی کوئی تصدیق نہیں ہوئی۔ تاہم، ویٹیکن نے موجودہ تعلقات کو “مثبت” اور “دو طرفہ تعاون پر مبنی” قرار دیا۔
About The Author
