اسلام آباد (سی این این اردو): ہتھیاروں کے کنٹرول اور عدم پھیلاؤ کے بارے میں پاک چین دوطرفہ مشاورت کا آٹھواں دور بیجنگ میں 29 سے 30 اگست 2023 تک منعقد ہوا۔
ترجمان وزارت خارجہ کے مطابق ، محمد کامران اختر، ایڈیشنل سیکرٹری (آرمز کنٹرول اور تخفیف اسلحہ) /پالیسی پلاننگ) پاکستان کی طرف سے اور مسٹر سن شیاؤبو، ڈائریکٹر جنرل، آرمز کنٹرول ڈیپارٹمنٹ، چین کی وزارت خارجہ نے اپنے اپنے وفود کی قیادت کی۔
بات چیت سے پہلے ایڈیشنل سیکرٹری نے جمہوریہ چین کے نائب وزیر خارجہ سن ویڈونگ سے ملاقات کی۔ ملاقات کے دوران فریقین نے پاک چین تعلقات، بین الاقوامی اور علاقائی سلامتی کی صورتحال اور باہمی دلچسپی کے متعدد امور پر تفصیلی تبادلہ خیال کیا۔
مشاورت کے دوران، دونوں فریقوں نے علاقائی اور عالمی سلامتی کی صورتحال سمیت ہتھیاروں کے کنٹرول، تخفیف اسلحہ اور عدم پھیلاؤ سے متعلق موضوعات کے وسیع میدان پر تبادلہ خیال کیا۔
پاکستان کے وفد نے بیجنگ میں چین کی آرم کنٹرول اینڈ ڈس آرمامنٹ ایسوسی ایشن (سی اے سی ڈی اے) اور چینی انسٹی ٹیوٹ آف کنٹیمپریری انٹرنیشنل ریلیشنز (سی آئی سی آر) سمیت اہم تھنک ٹینکس کا بھی دورہ کیا۔ دوروں کے دوران دونوں ممالک کے تھنک ٹینکس اور تحقیقی اداروں کے درمیان اسٹریٹجک رابطے کو مزید بڑھانے پر اتفاق کیا گیا۔
دونوں فریقین نے باہمی اتفاق کی تاریخ پر اگلے سال نویں دور کے انعقاد پر بھی اتفاق کیا۔
