وفاقی وزیر برائے انسانی حقوق، قانون و پارلیمانی امور، سینیٹر اعظم نذیر تارڑ نے منگل کے روز پاکستان نیشنل آرٹس کونسل میں آرٹ آف پیرنٹنگ کی افتتاحی تقریب سے خطاب کیا.انہوں نے اہم سماجی مسائل کو اجاگر کرتے ہوۓ ان کے مؤثر حل کے لیے مشترکہ کاوشوں کی ضرورت پر زور دیا۔
وفاقی وزیر نے کہا سماجی چیلنجز سے نمٹنے کے لیے جامع اقدامات کی ضرورت ہے۔خاص طور پر پالیسی سازی اور اس پر عملدرآمد۔ہم پالیسیاں بناتے ہیں، لیکن ان پر عمل درآمد کرنا ایک چیلنج ہے۔اس سلسلے میں، حکومت، سول سوسائٹی، اور تمام دیگر کا تعاون کرنا ضروری ہے۔انہوں نے کہا کہ بچوں کی بہتر پرورش ہر گھرانے کے لیے ایک بنیادی مسئلہ ہےجو اقتصادی تفاوت سے بالاتر ہے۔
انہوں نے کہا معاشرے کو غربت، بے بسی، اور چائلڈ لیبر جیسے مسائل کا بھی سامنا ہے۔جو خاندانوں کی اپنے بچوں کی مناسب پرورش اور تعلیم فراہم کرنے کی صلاحیت پر نمایاں اثر ڈالتے ہیں۔ان مسائل کو مؤثر طریقے سے کم کرنے کے لیے مضبوط خاندانی منصوبہ بندی کے اقدامات کی بھی ضرورت ہے۔
وفاقی وزیر انسانی حقوق نے کہا ہمیں عوام میں بچوں کی صحیح پرورش میں ان کے کردار کے بارے میں شعور اجاگر کرنا چاہیے۔
بچوں کی نشونما میں سرمایہ کاری کی اہمیت کو اجاگر کرنا چاہئے اور اس بات پر زور دیا کہ ان مسائل کو حل کرنا پاکستان کی آنے والی نسلوں کے خوشحال مستقبل کو یقینی بنانے کے لیے ضروری ہے۔
وفاقی وزیر اعظم نذیر تارڑ نے پاکستان میں بچوں کی پرورش میں والدین کو شعور فراہم کرنے کے طریقوں کو فروغ دینے اور بچوں کے حقوق کے تحفظ کے لیے پالیسیوں اور اقدامات کو آگے بڑھانے کے عزم کا اعادہ کیا۔
About The Author
