پاکستان پیپلزپارٹی کے چیئرمین بلاول بھٹو زرداری نے کہا ہے کہ دہشت گردوں کے عزائم کو ناکام بنانے کے لئے دہشت گردی کے بیانیے کو شکست دینا ہوگی، بلوچستان کو امن کا مکمل گہوارہ بنانے کے لئے صوبے میں گراس روٹ لیول تک سیاسی عمل ضروری ہے۔بلاول بھٹو زرداری نے یہ بات جمعرات کے روز وزیر اعلیٰ ہاؤس کوئٹہ میں امن و امان اور ترقیاتی منصوبوں سے متعلق بریفنگ میں اظہار خیال کرتے ہوئے کہی۔
اس موقع پر چئیرمین پاکستان پیپلز پارٹی کو بلوچستان میں امن و امان ، ترقیاتی منصوبوں اور صحت سمیت رواں مالی سال کے نئے بجٹ 2024 میں شامل سماجی ترقی کے منصوبوں پر بریفنگ دی گئی اجلاس میں وزیراعلیٰ بلوچستان میر سرفراز بگٹی اور دیگر راہنماوں اور اعلی حکام نے بھی شرکت کی۔بریفنگ میں چیئرمین پی پی پی کو بے نظیر بھٹو سکالرشپ پروگرام، پیپلز ائیر ایمبولنس اور گرین بس سروس کے قیام کے حوالے سے بریفنگ دی گئی بریفنگ میں بتایا گیا کہ بلوچستان میں این آئی سی وی ڈی اور گمبٹ انسٹیٹیوٹ اف لیور ٹرانسپلانٹ کے قیام سمیت، سکل ورکرز کارڈ پروگرام اور ریسکیو 1122 سروس کا بھی آغاز کیا جا رہا ہے۔تعلیم کے ترقیاتی بجٹ میں 300 فیصد جبکہ صحت کے ترقیاتی بجٹ میں 129 فیصد اضافہ کیا گیا ہے۔
اس کے ساتھ ساتھ بلوچستان کے دور افتادہ علاقوں میں صحت کی سہولیات فراہم کرنے کے لیے ہیلتھ آن ویلز پروگرام اور کینسر کے مریضوں کے لیے مفت ادویات کی فراہمی کا سلسلہ بھی شروع کر دیا گیا ہے بریفنگ میں مزید بتایا گیا کہ بلوچستان میں 30 ہزار سے زائد زرعی ٹیوب ویلز کی شمسی توانائی پر منتقلی کے منصوبے کو باہمی مشاورت سے حتمی شکل دی جاررہی ہے زراعت کی ترقی کے لیے بلوچستان کے کاشتکاروں کو گرین ٹریکٹرز فراہم کرنے کا فیصلہ کیا گیا ہے اس کے علاوہ انٹرنیشنل ڈرائیورنگ کی تربیت کے حوالے سے کچلاک میں مفت سکول کے قیام کے حوالے سے بھی بجٹ مختص کیا گیا ہے، دریائے سندھ سے آنے والی کچھی کینال کے اگلے فیز کی تعمیر کے لیے 10 ارب روپے مختص کیے گئے ہیں۔
بلوچستان کے بےروزگار گریجویٹس کو بلا سود قرضوں کی فراہمی کے لیے چار ارب روپے مختص کیے گئے ہیں صوبے میں یوتھ سکلز ڈیویلپمنٹ پروگرام کے تحت دو سالوں میں 30 ہزار نوجوانوں کو تربیت فراہم کر کے بیرون ملک روزگار کے مواقع فراہم کرنے کا منصوبہ ہے دنیا کی 200 سے زائد یونیورسٹیوں میں سائنس کے مضامین میں پی ایچ ڈی کرنے والے بلوچستان کے طلباء کو صوبائی حکومت نے اسکالرشپ دینے کی پالیسی مرتب کی ہے۔
اجلاس سے خطاب کرتے ہوئے چیئرمین پاکستان پیپلز پارٹی بلاول بھٹو زرداری نے کہا کہ بلوچستان کی ترقی اور خوشحالی ہماری ترجیحات میں شامل ہے پاکستان پیپلز پارٹی نے بلوچستان کو ترقی کی راہ پر گامزن کرنے کے لیے درست سمت کا تعین کیا ہے اور ایک جامع انداز سے عوام کی مجموعی فلاح و بہبود کو مدنظر رکھتے ہوئے پالیسیاں مرتب کی جا رہی ہیں انہوں نے کہا کہ بلوچستان کی پہلی یوتھ پالیسی خوش آئند ہے تاہم اس پر بلا تاخیر اور مکمل عمل درآمد ضروری ہے تاکہ نوجوانوں کو رہنمائی کے زیادہ سے زیادہ مواقع میسر آسکیں انہوں نے ہدایت کی کہ بلوچستان میں سندھ کی طرز پر صحت کے منصوبوں کی فوری تکمیل جلد از جلد مکمل کی جائے اور صوبے میں 2022 کے سیلاب سے متاثرہ افراد کے لیے گھروں کی تعمیر کے منصوبے کی تکمیل میں تیزی لائی جائے۔
بلاول نے کہا ذرائع مواصلات کی ترقی اور عوامی سہولیات کے لئے گوادر سے کوئٹہ اور سبی سے جعفر آباد تک پورے بلوچستان کے انفراسٹرکچر کی بہتری کے لیے ہنگامی بنیادوں پر اقدامات اٹھائے جائیں اور ایسے اجتماعی نوعیت کے بڑے منصوبوں پر بلا تاخیر عمل درآمد تیز کیا جائے جن کے فوائد سے عوام براہ راست مستفید ہو سکیں۔
بریفنگ میں اظہار خیال کرتے ہوئے وزیر اعلٰی بلوچستان میر سرفراز بگٹی نے کہا کہ بلوچستان میں گڈ گورننس کے قیام اور دستیاب وسائل کو عوامی ضروریات سے ہم آہنگ کرنے کے لئے اصلاحات کا عمل شروع کردیا گیا ہے۔ صوبے میں بحالی امن کے لئے اقدامات کو موثر بناکر عوام کے جانی و مالی تحفظ کو یقینی بنایا جا رہا ہے وزیر اعلٰی بلوچستان نے وفاقی پی ایس ڈی پی میں بلوچستان کے ترقیاتی منصوبوں کی حمایت پر چئیرمین پاکستان پیپلز پارٹی کا شکریہ ادا کرتے ہوئے کہا کہ بلوچستان میں امن، تعلیم، صحت ، ذرائع مواصلات سمیت تمام شعبوں میں بہتری لاکر عوام کو درپیش مشکلات اور مسائل کا ازالہ کیا جائے گا۔
