چین کے سفیر جیانگ ژئی ڈونگ کی وفاقی وزیر اطلاعات و نشریات عطاءاللہ تارڑ سے ملاقات

اسلام آباد : پاکستان میں تعینات چین کے سفیر جیانگ ژئی ڈونگ کی وفاقی وزیر اطلاعات و نشریات عطاءاللہ تارڑ سے ملاقات ہوئی، جس میں چینی سفیر نے عطاءاللہ تارڑ کو وزارت اطلاعات کا قلمدان سنبھالنے پر مبارکباد پیش کی۔

اس ملاقات میں سی پیک، پاک چین اسٹریٹجک تعلقات، میڈیا اور فلم کے شعبے میں جاری تعاون اور چین پاکستان انفارمیشن کوریڈور سے متعلق تبادلہ خیال کیا گیا۔

ملاقات میں دونوں ممالک کے درمیان میڈیا کے شعبوں میں تعاون کو وسعت دینے اور سی پیک کے بارے میں جعلی خبروں کی روک تھام کے لئے پاک چین انفارمیشن کوریڈور کے قیام کے حوالے سے گفتگو بھی ہوئی۔

وفاقی وزیر اطلاعات نے سی پیک کے حوالے سے جعلی خبروں کے انسداد کے لئے حکومت سے حکومت اور میڈیا سے میڈیا کی سطح پر میکنزم وضع کرنے کی ضرورت پر زور دیا۔

اس موقع پروفاقی وزیر اطلاعات کا کہنا تھا کہ پاکستان چین کے ساتھ اپنے تعلقات کو قدر کی نگاہ سے دیکھتا ہے۔دونوں ممالک دوستی کے لازوال رشتے میں بندھے ہوئے ہیں۔

عطاء تارڑ نے چینی سفیر کو آگاہ کیا کہ 1998ءمیں میرے دادا رفیق تارڑ نے بطور صدر چین کے وزیراعظم کے دورہ پاکستان پر ان کا استقبال کیا تھا۔پاک چین دوستی ہم نے نسل در نسل دیکھی ہے۔

وفاقی وزیر نے کہا کہ ہمیں اپنی نئی نسل کو اپنی تاریخی اور مضبوط دوستی کے بارے میں آگاہ کرنا ہوگا اور ہمیں نئی نسل کو بتانا ہوگا کہ کس طرح چین اور پاکستان نے مشکل وقت میں ایک دوسرے کا ساتھ دیا۔اس کے ساتھ ساتھ چین نے شنگھائی تعاون تنظیم اور اقوام متحدہ سمیت ہر عالمی فورم پر پاکستان کی حمایت کی۔

دونوں ممالک کے درمیان سی پیک کی صورت میں قریبی اور پائیدار شراکت داری خطے کے وسیع تر مفاد میں ہے۔سی پک پاکستان کی معاشی ترقی کو فروغ دینے کے لئے ایک اہم سنگ میل کی حیثیت رکھتا ہے۔

چین پاکستان اقتصادی راہداری علاقائی رابطوں کا ایک ایسا فریم ورک ہے جس سے نہ صرف چین اور پاکستان کو فائدہ ہوگا بلکہ ایران، افغانستان، ہندوستان، وسطی ایشیائی جمہوریہ اور خطے پر اس کے مثبت اثرات مرتب ہوں گے۔

وفاقی وزیر اطلاعات نے مزید کہا کہ چین پاکستان انفارمیشن کوریڈور سی پیک کے بارے میں جعلی خبروں کی روک تھام کی جانب ایک اہم اسٹریٹجک اقدام ہوگا۔اس کا مقصد ڈیجیٹل کنیکٹیویٹی اور معلومات کے تبادلے کی طاقت کو بروئے کار لانا ہے۔وزارت اطلاعات اس حوالے سے اپنا کام جاری رکھے گی۔

وزیراعظم شہباز شریف کا وژن ہے کہ پاکستان کو سرمایہ کار دوست ملک بنانا ہوگا۔

ملاقات میں دونوں ممالک کے درمیان فلم اور ثقافت کے شعبہ میں تعاون کو وسعت دینے پر بھی اتفاق کیا گیا۔

چین کی طرح پاکستان بھی ایک قدیم تہذیب ہے جس کی تاریخ سات ہزار سال پرانی ہے۔پاکستان کی وادی سندھ سے بہت سی روحانی اور ثقافتی تحریکیں ابھریں جنہوں نے ایشیائی ثقافت کی شکل اختیار کی۔

پاکستان کی قدیم گندھارا تہذیب نے بدھ مت کو چین سمیت مشرقی ایشیا کے بڑے حصے میں متعارف کرایا۔ پاکستان اور چین نے گزشتہ سال پیلس میوزیم میں گندھارا بدھسٹ نمائش کا مشترکہ طور پر اہتمام بھی کیا تھا۔

دونوں فریقین نے پاکستان اور چین کے درمیان ایس ڈی جیز کے ایجنڈے کو آگے بڑھانے کے حوالے سے بھی تبادلہ خیال ہوا۔

رومینہ خورشید عالم ایس ڈی جیز پروجیکٹ کے حوالے سے چین کے ساتھ قریبی رابطہ رکھے ہوئے ہیں۔

اس موقع پر پاکستان کی سرکاری نیوز ایجنسی ایسوسی ایٹڈ پریس آف پاکستان اور چین کے چائنا میڈیا گروپ (سی ایم جی) کے درمیان تیسرے بیلٹ اینڈ روڈ فورم کے لئے ایم او یو کے حوالے سے بھی گفتگو ہوئی۔دونوں ممالک کی حکومتوں کے درمیان فلم پروڈکشن کا معاہدہ بھی زیر عمل ہے۔اے پی پی اور شنہوا نیوز ایجنسی کے درمیان مفاہمت کی یادداشت پر کام جاری ہے۔

سی جی ٹی این اور پی ٹی وی کے درمیان سفری دستاویز کی مشترکہ پروڈکشن کے لئے تعاون پر بھی گفتگو ہوئی.

اپنا تبصرہ لکھیں