اسلام آباد پولیس کے انسداد انتہاء پسندی یونٹ نے کارروائی کرتے ہوئے سوشل میڈیا پر مذہبی، مسلکی، لسانی منافرت پھیلانے والے 462 اکاونٹس بند کروا دئیے۔
ترجمان اسلام آباد پولیس کے مطابق اسلام آباد پولیس نے منفی سرگرمیوں میں ملوث 1522 اکاونٹس کی نشان دہی کی ہے۔ان اکاونٹس کی بندش کے لئے ایف آئی اے کو خط لکھا گیا۔جس کے نتیجے میں ایف آئی اے نے سوشل میڈیا اکاونٹس کو بند کروا دیا۔
بند ہونے والے اکاونٹس میں 65 مذہبی، 47 ملک کے خلاف پراپیگنڈہ کرنے اور 350 اکاونٹس دہشت گردی مواد پھیلانے میں ملوث تھے۔جبکہ باقی 1060 اکاونٹس کو بھی جلد بند کردیا جائے گا۔
اسلام آباد پولیس کا کہنا ہے کہ انتہا پسندی کی روک تھام سے دہشت گردی کے تدارک اور شہر کی سکیورٹی کو موثر بنانے میں مدد مل رہی ہے۔ایسی منفی سرگرمیوں میں ملوث افراد کے خلاف قانونی کارروائی بھی عمل میں لائی جائے گی۔
تاہم پولیس کی طرف سے جاری بیان میں مذکورہ 1522 اکاونٹس چلانے اور بنانے والوں کے خلاف کسی قانونی کاروائی سے متعلق آگاہ نہیں کیا گیا۔ترجمان کا اعلامیہ صرف ایف آئی اے کو خط لکھ کر اکاونٹس بند کرنے کی اطلاع تک محدود ہے۔
