اسلام آباد .اسلام آباد میں تعنات اسلامی جمہوریہ ایران کے سفیر رضا امیری مقدم نے اپنے x سابق ٹویٹر پر اپنے پیغام میں کہا ہے کہ ایک بار پھر قابلِ نفرت دشمن کی پروپیگنڈا مشینری متحرک ہو گئی ہے، جو اسلامی جمہوریہ ایران کے سپریم لیڈر کے بارے میں جعلی اور من گھڑت خبریں پھیلا رہی ہے اور بے بنیاد الزامات عائد کر رہی ہے۔ ان جھوٹے اور مضحکہ خیز دعوؤں کو دوٹوک انداز میں مسترد کرتے ہوئے کہا گیا ہے کہ یہ گمراہ کن مہم دشمن کی ناکامیوں پر پردہ ڈالنے کی ایک ناکام کوشش ہے—ایسی ناکامیاں جنہیں وہ میدانِ جنگ میں 12 روزہ جنگ کے دوران بہادر ایرانی فوجیوں اور کمانڈرز کے خلاف حاصل نہ کر سکا۔
بیان میں کہا گیا کہ ایرانی فوجیوں اور کمانڈرز نے اپنی محبوب سرزمین کے مقدس مٹی پر جرات و عزم کے ساتھ مزاحمت کی، جارحیت کا وقار کے ساتھ مقابلہ کیا، اور وطن کے دفاع میں اپنی جانوں کا نذرانہ پیش کر کے شہادت کا رتبہ پایا۔ ایران کے دانشمند، بہادر اور ثابت قدم قائد، مسلح افواج کے سپریم کمانڈر کی حیثیت سے، عوام اور قومی سلامتی کے اداروں کے شانہ بشانہ کھڑے ہیں۔
اسی تناظر میں پاکستان کے تمام معزز میڈیا اداروں اور صحافیوں سے پرزور اپیل کی گئی ہے کہ وہ مستند اور تصدیق شدہ ذرائع پر انحصار کریں اور معلومات کی تصدیق میں مکمل احتیاط برتیں، خصوصاً ایسے ماحول میں جہاں ڈیجیٹل دہشت گردی، غلط معلومات اور اخلاقی بے ضابطگیاں تیزی سے پھیل رہی ہیں۔ اس پیشہ ورانہ ذمہ داری کی ادائیگی ہی پاکستانی صحافت اور میڈیا کے وقار اور ساکھ کے تحفظ کی ضامن ہے۔
About The Author
