ویب ڈیسک : 90 کی دہائی کو فاسٹ بولنگ کا سنہرا دور سمجھا جاتا ہے اور اسی دور میں ایک ایسا بولر موجود تھا جو حد سے زیادہ تیز تھا مگر شعیب اختر یا بریٹ لی جیسی شہرت نہ پا سکا—ڈنکن سپینسر۔ جس بھی بیٹر نے سپینسر کا سامنا کیا، اس کے پاس سنانے کے لیے ایک نہ ایک دلچسپ کہانی ضرور موجود ہے۔
لنکاشائر میں پیدا ہونے والے اور پرتھ میں پروان چڑھنے والے سپینسر نہ صرف غیر معمولی اسپیڈ رکھتے تھے بلکہ اگر ان کا جسم ساتھ دیتا تو وہ بآسانی انگلینڈ یا آسٹریلیا کی نمائندگی کر سکتے تھے۔ ویسٹ انڈیز کے عظیم بلے باز ویو رچرڈز نے انھیں اپنے سب سے تیز ترین مخالفین میں شمار کیا، جبکہ سابق آسٹریلوی کپتان رکی پونٹنگ بھی تقریباً یہی رائے رکھتے تھے۔
بی بی سی سپوٹس کے مطابق،درہم کے کوچ اور ویسٹرن آسٹریلیا کی ٹیم میں ان کے ساتھی، رائن کیمپبل، کہتے ہیں کہ سپینسر ’خوف زدہ کر دینے کی حد تک تیز‘ تھے۔ ان کے مطابق:
’میں نے اپنے پورے جونیئر کیریئر میں سپینسر کا سامنا کرنے کا “لطف” اٹھایا ہے۔ ان کا رن اپ دیکھ کر ہی اندازہ ہو جاتا تھا کہ یہ ڈلیوری بہت برق رفتار ہو گی—اور واقعی وہ سب سے تیز تھے۔‘
کیمپبل مزید کہتے ہیں:
’میری زندگی میں صرف چار بولرز ایسے ہیں جن کے بارے میں میں کہتا ہوں کہ وہ ناقابلِ یقین حد تک تیز تھے—شعیب اختر، بریٹ لی، شون ٹیٹ اور ڈنکن سپینسر۔‘
دلچسپ بات یہ ہے کہ سپینسر کوئی دراز قد بولر نہیں تھے۔ آج 53 برس کی عمر میں بھی ان کے کندھے مضبوط ہیں، مگر ان کا قد صرف پانچ فٹ آٹھ انچ ہے، جو ایک فاسٹ بولر کے روایتی قد سے کم سمجھا جاتا ہے۔ ان کی کمر کا پہلا آپریشن صرف 17 برس کی عمر میں ہوا تھا، جس نے ان کے کیریئر کو بار بار متاثر کیا۔
آسٹریلیا کے سابق آل راؤنڈر ٹوم موڈی کہتے ہیں:
’میں سپینسر کا موازنہ مارک وڈ سے کرتا ہوں۔ جیسے کسی وی–ایٹ انجن کو منی مائنر میں لگایا جائے—طاقتور، بے قابو اور حیران کن رفتار کے ساتھ۔‘
ڈنکن سپینسر کا نام تاریخ کے سب سے تیز بولرز کی فہرست میں شاید اوپر نظر نہ آئے، مگر جنہوں نے ان کا سامنا کیا، ان کے لیے وہ ہمیشہ ایک ناقابلِ فراموش، خوف زدہ کر دینے والے فاسٹ بولر رہیں گے۔
About The Author
