دنیا بھر سے نامور شخصیات کی شرکت — مثبت صحافت اور قومی تشخص کے فروغ پر زور
ویانا (آسٹریا) — نمائندہ خصوصی زاہد غنی چوہان:
پاک میڈیا جرنلسٹ فورم انٹرنیشنل کے یومِ تاسیس کے موقع پر ایک پُروقار ورچوئل کانفرنس کا انعقاد کیا گیا، جس میں پاکستان سمیت دنیا بھر سے نامور صحافیوں، اینکر پرسنز، پارلیمنٹیرینز، سفارت کاروں، ڈپلومیٹس اور فورم کے مرکزی و بین الاقوامی عہدیداران نے شرکت کی۔
کانفرنس کی صدارت چیئرمین نورالحسن گجر اور ڈاکٹر عبدالرحمن اسامہ نے مشترکہ طور پر کی۔
ورچوئل اجلاس سے جن ممتاز شخصیات نے خطاب کیا، ان میں شامل تھے:
پاکستان میں آسٹریا کے سفیر محمد کامران اختر ملک، لاہور لیڈز یونیورسٹی کے وائس چانسلر پروفیسر ڈاکٹر ندیم احمد بھٹی، وزیر منصوبہ بندی گلگت بلتستان راجہ ناصر علی خان، ایمبیسیڈر ڈاکٹر ملک ندیم عابد، ممتاز قانون دان بریسٹر امجد ملک، ترجمانِ غزہ و فلسطین جلال الفرا، پی ایف یو جے کے صدر رانا عظیم، معروف اینکر پرسن ڈاکٹر عمر ریاض عباسی، تجزیہ نگار حنیف قمر، سعودی عرب سے سینئر صحافی ڈاکٹر سمیرا عزیز، آسٹریا چیپٹر ہیڈ محمد عامر صدیق، ریاض بلوچ اور دیگر معزز شخصیات۔
اجلاس میں فورم کے عہدیداران نے شرکاء کو خوش آمدید کہا اور تنظیم کے قیام، مقاصد، اب تک کی کارکردگی اور مستقبل کے اہداف پر تفصیل سے روشنی ڈالی۔
اس موقع پر مقررین نے کہا کہ پاک میڈیا جرنلسٹ فورم انٹرنیشنل پاکستانی صحافیوں کے مابین اتحاد، پیشہ ورانہ تربیت، عالمی سطح پر مثبت صحافت اور وطنِ عزیز کے تشخص کے فروغ کے لیے ایک مؤثر اور باوقار پلیٹ فارم بن چکا ہے۔
مقررین نے فورم کے یومِ تاسیس پر مبارکباد دیتے ہوئے کہا کہ
“صحافت صرف خبر رسانی کا ذریعہ نہیں بلکہ قوم کی فکری رہنمائی، اصلاحِ معاشرہ اور پاکستان کے روشن چہرے کو دنیا کے سامنے اجاگر کرنے کا ایک طاقتور ذریعہ ہے۔”
تقریب کے اختتام پر شرکاء نے فلسطین کے مظلوم عوام کے ساتھ اظہارِ یکجہتی کیا اور افواجِ پاکستان کو بھارت اور افغانستان کی جارحیت کا منہ توڑ جواب دینے پر زبردست خراجِ تحسین پیش کیا۔
About The Author
