اسلام آباد — پاکستان کے معروف او ٹی ٹی اسٹریمنگ پلیٹ فارم ٹیپ میڈ (tapmad) نے بنگلہ دیش کی سب سے بڑی ٹیلی کمیونی کیشن کمپنی گریمن فون (Grameenphone) کے ساتھ ایک اہم اسٹریٹجک شراکت داری کا اعلان کیا ہے۔ اس اشتراک کے نتیجے میں اب بنگلہ دیش کے ناظرین بھی اعلیٰ معیار کے کھیلوں اور تفریحی مواد سے لطف اندوز ہو سکیں گے۔
اس معاہدے کے تحت بنگلہ دیشی صارفین کو ٹیپ میڈ کے وسیع کیٹلاگ میں موجود لائیو اسپورٹس، فلمیں اور آن ڈیمانڈ تفریحی مواد تک آسان رسائی حاصل ہوگی۔ صارفین گریمن فون موبائل بیلنس کے ذریعے MyGP ایپ، ٹیپ میڈ ایپ یا ویب سائٹ سے سبسکرپشن حاصل کر سکیں گے۔ مزید سہولت کے لیے ہفتہ وار اور ماہانہ پیکجز بھی متعارف کرائے گئے ہیں جو مقامی ضروریات کے مطابق ترتیب دیے گئے ہیں۔
ٹیپ میڈ کے سی ای او یاسر پاشا نے کہا:
“گریمن فون کے ساتھ یہ شراکت داری ہمارے لیے پاکستان سے باہر قدم بڑھانے کی ایک اہم پیش رفت ہے۔ ہم بنگلہ دیشی ناظرین کے لیے عالمی معیار کی اسٹریمنگ سروس پیش کر کے خوشی محسوس کر رہے ہیں۔ ہمارا مقصد مناسب قیمت، آسان رسائی اور معیاری مواد کے ذریعے بنگلہ دیش میں کھیل اور تفریح کے انداز کو نئی جہت دینا ہے۔”
گریمن فون کے ہیڈ آف ڈیجیٹل پلیٹ فارم، پیمنٹ اینڈ پارٹنرشپ، زاہد الزمان نے کہا:
“ہماری کوشش ہے کہ صارفین کو جدید ڈیجیٹل سہولیات فراہم کی جائیں۔ ٹیپ میڈ کے ساتھ اشتراک سے ہمارے صارفین کو عالمی معیار کی اسپورٹس اور انٹرٹینمنٹ سروس تک براہِ راست رسائی حاصل ہوگی، جس میں موبائل بیلنس کے ذریعے آسان سبسکرپشن شامل ہے۔ یہ شراکت ڈیجیٹل طرزِ زندگی کو مزید بہتر بنانے کی جانب ایک اہم قدم ہے۔”
ٹیپ میڈ کی پہچان اس کے خصوصی اسپورٹس مواد کی وجہ سے ہے، جو دنیا بھر کے بڑے ایونٹس جیسے انگلش پریمیئر لیگ، ایشیا کپ، ایم ایم اے، پی ایف ایل اور دیگر عالمی ٹورنامنٹس تک رسائی فراہم کرتا ہے۔ پلیٹ فارم پر مختلف لائیو اور آن ڈیمانڈ پروگرامز دستیاب ہیں جو کھیلوں کے ہر شوقین کے لیے موزوں ہیں۔ جلد ہی بین الاقوامی کرکٹ ٹورز بھی شامل کیے جائیں گے تاکہ بنگلہ دیشی ناظرین ایچ ڈی کوالٹی میں لائیو ایکشن دیکھ سکیں۔
ٹیپ میڈ کے سی او او علی رانا نے کہا:
“بنگلہ دیش ایک تیزی سے ترقی کرتا ہوا مارکیٹ ہے، اور ہم یہاں کے صارفین کے لیے ایک عالمی معیار کا اسٹریمنگ تجربہ فراہم کرنے کے لیے پُرعزم ہیں، جو ان کی دلچسپیوں اور ضروریات کے مطابق ہو۔”
“کھیل اور تفریح بنگلہ دیشی عوام کے دلوں کے قریب ہیں۔ گریمن فون کے ساتھ یہ شراکت ہمیں یہ مواد زیادہ آسانی، بہتر معیار اور قابلِ اعتماد انداز میں ناظرین تک پہنچانے میں مدد دے گی۔”
تقریباً ایک دہائی سے کامیابی کے ساتھ ترقی کرتے ہوئے ٹیپ میڈ جنوبی ایشیا میں ڈیجیٹل اسٹریمنگ کے میدان میں ایک نمایاں مقام حاصل کر چکا ہے۔ گریمن فون کے ساتھ یہ شراکت سرحدوں سے ماورا، اعلیٰ معیار کے تفریحی مواد تک رسائی کے ایک نئے دور کا آغاز ہے۔
ٹیپ میڈ ایپ اب گوگل پلے اسٹور اور ایپل ایپ اسٹور پر دستیاب ہے۔
About The Author
