آغدام، آذربائیجان – اکنامک کوآپریشن آرگنائزیشن (ECO) یوتھ فورم 2025 آذربائیجان کے ضلع آغدام میں ECO ویک کے سلسلے میں منعقد ہوا، جو کہ پہلی بار ہے کہ ایسا کوئی بین الاقوامی نوجوانوں کا اجلاس کراباخ کے خطے میں منعقد کیا گیا ہو۔
فورم میں ECO کے 9 رکن ممالک سے تعلق رکھنے والے تقریباً 50 نوجوان رہنما، حکومتی نمائندے، ماہرین اور تنظیمی عہدیداران نے شرکت کی۔ اس فورم کا مقصد نوجوانوں کو علاقائی مکالمے میں شامل کرنا، اہم مسائل کے حل تجویز کرنا، اور پالیسی سازی پر مثبت اثر ڈالنا تھا۔
شرکاء نے مختلف اہم موضوعات پر گفتگو کی جن میں اقتصادی و تجارتی تعاون، پائیداری اور ٹیکنالوجی، انسانی ترقی، اور عوامی روابط (People-to-People Dialogue) شامل تھے۔
آذربائیجان کے وزیر برائے نوجوانان و کھیل، فرید غیبیوف نے اپنے خطاب میں کہا:
“کراباخ میں اس نوعیت کا پہلا بین الاقوامی یوتھ فورم منعقد ہونا اس بات کا ثبوت ہے کہ آذربائیجان نوجوانوں کی ترقی کے لیے پُرعزم ہے۔ ہمارے ملک میں 35 سے زائد یوتھ ہاؤسز اور 100 سے زائد تنظیمیں و فنڈز فعال ہیں۔ ہم امید کرتے ہیں کہ یہ فورم نوجوانوں کی پالیسی پر ایک مؤثر دستاویز کے اجرا پر منتج ہوگا۔”
ای سی او کے سیکرٹری جنرل ڈاکٹر اسد مجید خان نے خطے میں نوجوانوں کی اہمیت پر روشنی ڈالتے ہوئے کہا:
“ECO خطے کی 60 فیصد آبادی نوجوانوں پر مشتمل ہے، لیکن تقریباً 30 فیصد نوجوانوں کو روزگار کے مواقع حاصل نہیں۔ ہمیں انہیں وہ مہارتیں، علم اور ٹیکنیکل قابلیت فراہم کرنی ہوگی جو تیزی سے بدلتی دنیا میں کامیابی کے لیے ضروری ہیں۔”
انہوں نے خاص طور پر نوجوان خواتین کو درپیش چیلنجز کا ذکر کیا اور کہا کہ سیاسی عدم استحکام اور تنازعات نوجوانوں کو غربت، بے روزگاری اور سماجی انتشار کی طرف دھکیل رہے ہیں۔
“تاہم ہمارا مشترکہ تاریخی اور ثقافتی ورثہ ہمیں ایک دوسرے سے جوڑتا ہے۔ ہمیں ہر موقع سے فائدہ اٹھا کر تعلقات کو مضبوط بنانا ہوگا۔ یہی ہمارے مستقبل کی سرمایہ کاری ہے۔”
فورم کا اختتام پینل سیشنز اور تین موضوعاتی ورکنگ گروپس کی تشکیل کے ساتھ ہوا، جن میں نوجوانوں نے ان تین شعبوں میں بھرپور بحث کی:
اقتصادی و تجارتی تعاون
پائیداری اور ٹیکنالوجی
انسانی ترقی و عوامی روابط
ان مباحثوں سے حاصل شدہ تجاویز اور سفارشات آئندہ خطے میں نوجوانوں سے متعلق پالیسی سازی میں کلیدی کردار ادا کریں گی۔
About The Author
