اسلام آباد صدر مملکت آصف علی زرداری کی جانب سے بینک فراڈ کے 31 متاثرین کو ریلیف کی فراہمی کے احکامات جاری کر دیئے گئے۔پیر کے روز چھ بینکوں کو بینک فراڈ کے 31 متاثرین کے 24.136 ملین روپے واپس کرنے کی ہدایت کی گئی۔
ایوان صدر کے مطابق صدر مملکت نے بینکنگ محتسب کے فیصلوں کے خلاف دائر 31 درخواستوں کو مسترد کرتے ہوئے فیصلے کر دیئے۔جن میں صدر مملکت نے فراڈ متاثرین کے حق میں بینکنگ محتسب کے فیصلوں کو برقرار رکھا۔فیصلے عوام کو انصاف اور فوری ریلیف فراہم کرنے کے صدر مملکت کے عزم کے عکاس ہیں۔
صدر مملکت آصف علی زراری نے یونائیٹڈ بینک لمیٹڈ کی 12 درخواستوں کو مسترد کر دیا۔یونائیٹڈ بینک لمیٹڈ کے 12 صارفین کو 1کروڑ 15 لاکھ روپے واپس کرنے کی ہدایت کی گئی۔
مسلم کمرشل بینک کے 10 صارفین کو مجموعی طور پر 52 لاکھ روپے سے زائد رقم واپس کرنے کی ہدایت۔الائیڈ بینک لمیٹڈ کی جانب سے دائر پانچ درخواستیں بھی خارج کر دی گئیں۔جس کے نتیجے میں الائیڈ بینک لمیٹڈ کو متاثرہ صارفین کو 40 لاکھ سے زائد رقم واپس کرنے کا حکم دیا گیا۔
بینک آف پنجاب کی دائر کردہ تین درخواستیں بھی خارج کر دی گئیں۔بینک آف پنجاب فراڈ سے متاثرہ 3 صارفین کو 23 لاکھ سے زائد رقم واپس کرے گا۔عسکری بینک لمیٹڈ کو ایک کیس میں 490,000 روپے واپس کرنے کی ہدایت کی گئی ہے۔حبیب بینک لمیٹڈ کے کیس میں ایک صارف کو 420,000 روپے ادا کرنے کی ہدایت کی گئی۔
تمام متاثرین کو نوسرباز افراد نے خود کو بینک کا نمائندہ ظاہر کرکے دھوکہ دیا۔نوسرباز افراد نے دھوکہ دہی پر مبنی فون کالز کے ذریعے صارفین سے بینکنگ کی حساس تفصیلات حاصل کیں۔صارفین سے ذاتی بینکنگ تفصیلات حاصل کرنے کے بعد صارفین کے اکاؤنٹس سے رقوم نکلوا لیں گئیں۔
صارفین نے فراڈ سے ہتھیائی رقم واپس لینے کے لیے بینکوں سے رجوع کیا لیکن ریلیف نہ دیا گیا۔جس پر متاثرہ فریقوں نے ریلیف کے حصول کیلئے بینکنگ محتسب سے رجوع کیا۔بنکنگ محتسب سے متاثرین کے حق میں فیصلے آنے کے بعد بینکوں نے محتسب کے فیصلوں کو چیلنج کرتے ہوئے صدر مملکت کو الگ الگ درخواستیں دائر کیں۔
صدر مملکت نے سماعت اور متعلقہ ریکارڈ کا جائزہ لینے کے بعد حتمی فیصلے سنائے۔صدر مملکت نے کمرشل بینکوں کی بدانتظامی ، مالیاتی دھوکہ دہی سے شہریوں کے بچاؤ میں بینکنگ محتسب کے کردار پر زور دیا۔صدر مملکت نے بینکنگ محتسب شکایات کے فوری حل کے لیے اہم ادارہ قرار دیا۔انہوں نے کہا بینکنگ محتسب طویل قانونی طریقہ کار کے بوجھ کے بغیر متاثرین کو بروقت انصاف فراہم کرتا ہے۔عوام بینکنگ تنازعات ، فراڈ سے نمٹنے کے لیے بینکنگ محتسب کی خدمات سے استفادہ کریں۔
