اسلام آباد میں اتوار کے روز وزارت موسمیاتی تبدیلی اور ماحولیاتی رابطہ، سنو لیپرڈ فاؤنڈیشن پاکستان اور صوبائی محکمہ جنگلی حیات کی مشترکہ کمیٹی نے پاکستان وائلڈ لائف پروٹیکشن ایوارڈز 2024کے 6 فاتحین کا اعلان کیا ہے۔
یہ اعلان گلگت بلتستان، خیبر پختونخواہ اور آزادجموں و کشمیر میں جنگلی حیات کے تحفظ میں نمایاں خدمات اور کارکردگی کی بنیاد پر کیا گیا ہے۔ اعزاز کے لیے برطانوی حکومت کے غیر قانونی وائلڈ لائف ٹریڈ چیلنج فنڈ (IWTCF) نے اشتراک کیا ہے۔
محکمہ جنگلات جنگلی حیات اور ماحولیات گلگت بلتستان کے رینج فاریسٹ آفیسر سرمد شفا نے قومی کیٹیگری میں سنو لیپرڈ ایوارڈ جیتا۔گلگت بلتستان کے ہی فیضان دکھی، رینج فاریسٹ آفیسر، اور کمال الدین، وائلڈ لائف انسپکٹر گلگت بلتستان جنگلی حیات اور ماحولیات نے گلگت بلتستان میں تحفظ اور تحفظ کی کوششوں پر آئی بیکس ایوارڈ اور بلیو شیپ ایوارڈ جیتا۔
خیبرپختونخوا محکمہ جنگلی حیات کے 2 تجربہ کار افسران وائلڈ لائف رینجر سید مصدق علی شاہ اور ڈپٹی رینجر وائلڈ لائف زاہد احمد کو بالترتیب مارخور ایوارڈ اور وولف ایوارڈ کے فاتح قرار دیا گیا۔جبکہ کستوری ہرن کا ایوارڈ جان محمد ناصر، گیم واچر، جنگلات، وائلڈ لائف اینڈ فشریز ڈیپارٹمنٹ اے جے کے نے حاصل کیا ہے۔
